|
In protte drokte oer de ferbaarningsoven yn Harns. Nei in reportaazje yn Zembla, mei in ûnhandich optreden fan de ferantwurdlik wethâlder en de deputearre dy’t net foar de kamera wol, binne de rapen gear.
Hoe sa iepenbierheid fan bestjoer?
De FNP-fraksje wie fan begjin ôf tsjin de komst fan it REC:
A: der komt tefolle ferbaarningskapasiteit yn Nederlân. Wy kinne it Fryske ôffal better nei bygelyks Alkmaar bringe – tsjin in geunstige priis.
B: de keppeling mei de sâltfabryk noasket ús net. De boaiemdelgong giet sa hieltyd fierder – ús gemeentegrinzen foarby.
C: de skealike stoffen dy’t it REC útstjit oer ús gea.
De gemeente Frj.’diel hat har unanym ferset tsjin de komst fan it REC, mar de grutte mearderheid fan de Fryske gemeenten hat yn de oandielhâldersfergadering foar stimt.
Individuele FNP-leden binne warber foar it komitee “Afvaloven Nee”.
Yn oktober sil de Raad van State útspraak dwaan oer de miljeufergunning.
Spitich dat riedslid Bein van Dijk fan de Pvda sa’n bytsje stipe kriget fan syn partijgenoaten.
Margreet de Boer, president-kommissaris fan Omrin, minister Cramer (miljeu) en de PvdA-steatefraksje binne allegear foar it REC.
De PvdA yn Harns lit it alhielendal ôfwitte yn it publieke debat. Van Dijk sil it REC net keare kinne ek al ropt hy noch sa lûd yn de gemeenterie. Doe’t Siem Cnossen fan it CDA Van Dijk dit efkes ûnder de noas wreau, rekken de partijen goed deilis.
Lokkich hat ús FNP-steatefraksje der mei foar soarge dat der yn de provinsje yn elts gefal in iepenbier debat oan it REC wijd wurdt. |
